අපේ දරුවන් ලෝකයෙන් කොන්වන දිනය වැඩි ඈතක නොවේ?
අධ්යාපනයේ "කල් ඉකුත් වීම" ගැන අනතුරු ඇඟවීමක්!
ශ්රී ලංකාවේ අධ්යාපන ප්රතිසංස්කරණයට එරෙහි වන සෑම පුද්ගලයෙක්ම දැනුවත්ව හෝ නොදැනුවත්ව අපේ රටේ දරුවන්ව ඉතාමත් මෑත කාලයකදී ලෝකයෙන් කොන්වීම සඳහා සුවිශාල දායකත්වයක් දෙන පිරිසක් බව ආරංචිරාළ තරයේ කියා සිටි යි.
අධ්යාපන ප්රතිසංස්කරණ වල අවශ්යතාවය පිළිබඳව ප්රවීණ නිර්මාණශීලී අධ්යයන උපදේශක දිලීප වන්නිආරච්චි මහතාගේ අදහස් කියවමු.
අද ඔබ ඔබේ දරුවාගේ පාසැල් පෙළපොතක් අතට ගෙන එහි දෙවන පිටුවේ ඉහළ වම් කෙළවර බලන්න.
එහි ප්රථම මුද්රණය සටහන්ව ඇත්තේ 2014 හෝ 2015 ලෙස විය හැකියි. එයින් අදහස් වන්නේ අපේ දරුවන් අදටත් ඉගෙන ගන්නේ මීට වසර 11-12කට පෙර සම්පාදනය කළ කරුණු බවයි.
ලෝකය කෘත්රිම බුද්ධිය (AI), රොබෝ තාක්ෂණය සහ නවීන ආර්ථික දර්ශක ගැන කතා කරන යුගයක, අපේ දරුවන් තවමත් දශකයකට වඩා පැරණි විෂය නිර්දේශයක හිරවී සිටීම බරපතල ඛේදවාචකයකි.
ඊයේ පෙරේදා මෙම විෂය නිර්දේශය යාවත්කාලීන කිරීමට ගත් උත්සාහය පවා විරෝධතා හමුවේ අත්හිටුවීමට රජයට සිදු විය.
මෙලෙස පමාවීමෙන් සිදුවන හානිය කුමක්ද?
අපේ විෂය කරුණු ලෝකයේ නව ප්රවණතා සමඟ ගැලපෙන්නේ නැතිනම්, ඉදිරියේදී:
1. ජාත්යන්තර විශ්වවිද්යාල අපේ දරුවන්ගේ සුදුසුකම් පිළිගැනීම ප්රතික්ෂේප කළ හැකිය.
2. ගෝලීය රැකියා වෙළඳපොළ තුළ ලාංකික උපාධිධාරීන්ට ඇති ඉල්ලුම ශීඝ්රයෙන් පහත වැටිය හැකිය.
3. තාක්ෂණික දැනුම අතින් අපේ දරුවන් ලෝකයට සාපේක්ෂව වසර ගණනාවක් පසුපසින් සිටිනු ඇත.
ආසියාතික රටවලින් අපට ගත හැකි උදාහරණ. අප අසල සිටින අසල්වැසි රටවල් පවා අද තම අධ්යාපන ක්රමය අතිනවීන මට්ටමට ගෙන ගොස් ඇත:
• වියට්නාමය: මීට වසර කිහිපයකට පෙර ඉතා දිළිඳු රටක්ව පැවති වියට්නාමය, ඔවුන්ගේ අධ්යාපන ක්රමය බටහිර රටවල මට්ටමට (PISA ප්රමිතීන්ට) අනුව යාවත්කාලීන කළා. අද ඔවුන්ගේ සිසුන් ගණිතය සහ විද්යාව අතින් ඇමරිකානු සිසුන්ටත් වඩා ඉදිරියෙන් සිටින අතර, ලොව ප්රමුඛ පෙළේ තාක්ෂණික සමාගම් තම කර්මාන්තශාලා වියට්නාමයට රැගෙන යයි.
• සිංගප්පූරුව: ඔවුන් සෑම වසර කිහිපයකට වරක්ම විෂය නිර්දේශය "Teach Less, Learn More" (අඩුවෙන් උගන්වන්න - වැඩියෙන් අවබෝධ කරවන්න) යන සංකල්පය යටතේ වෙනස් කරයි. ඒ නිසාම සිංගප්පූරු අධ්යාපන සහතික ලෝකයේ ඕනෑම තැනක ඉහළින්ම පිළිගැනේ.
• ඉන්දියාව: නව ජාතික අධ්යාපන ප්රතිපත්තිය (NEP 2020) හරහා ඉන්දියාව හයවන ශ්රේණියේ සිටම දරුවන්ට "Coding" සහ වෘත්තීය පුහුණුව ලබා දීම ආරම්භ කළා.
අප කළ යුත්තේ කුමක්ද?
දේශපාලන හෝ පටු අරමුණු මත පදනම්ව අධ්යාපන ප්රතිසංස්කරණවලට විරෝධය පෑමෙන් සිදුවන්නේ අපේ දරුවන්ගේ අනාගතය අඳුරු වීමයි. අපට අවශ්ය වන්නේ විභාග සමත් කරන පරම්පරාවක් නොව, ලෝකය සමඟ කරට කර සිටිය හැකි බුද්ධිමත් පරම්පරාවකි.
වෙනස් විය යුත්තේ විෂය නිර්දේශය පමණක් නොව, ඒ දෙස බලන අපේ ආකල්පයි!
ආරංචි රාළ 2026.01.21; 158 වන දිගහැරුම
Comments
Post a Comment